“Монгол-Туркийн стратегийн харилцаа XXI зуунд” цахим хэлэлцүүлэгт оролцов

Нийтлэсэн Б Нямдаваа
2021-05-31
536

Анкара хотын Хажи Баярам Вэли их сургуулийн Ази судлалын тэнхим Монгол Улсаас Бүгд Найрамдах Турк Улсад суугаа ЭСЯ-ны дэмжлэгтэйгээр 2021 оны 5 дугаар сарын 25-ны өдөр “Монгол-Туркийн стратегийн харилцаа XXI зуунд” сэдэвт цахим хэлэлцүүлэгийг зохион байгууллаа.

Тус хэлэлцүүлэгт “Монгол-Туркийн стратегийн түншлэлийн боломж” /турк хэл дээр/ сэдвээр ШУА-ийн Олон улсын харилцааны хүрээлэнгийн Гуравдагч хөрш орон судлалын салбарын эрхлэгч, доктор Ч.Цэрэннадмид илтгэл хэлэлцүүлж оролцов.

Хэлэлцүүлэгт Турк, Монгол судлаачдын нийт 6 илтгэлийг танилцуулсан бөгөөд дор дурдсан сэдвийн хүрээнд идэвхтэй хэлэлцүүлэг өрнөв. Үүнд:

“Турк, Монголын харилцааны орчин үеийн асуудлууд” /др. проф. Хусейн Багжи, Ойрх Дорнодын Технологийн их сургууль /Анкара хот/
“Монгол-Туркийн хооронд Чөлөөт худалдааны хэлэлцээр байгуулах боломж” Ч.Цэцэгмаа, Стратеги судалгааны хүрээлэнгийн Эдийн засгийн судалгааны секторын эрхлэгч
“Турк-Монголын харилцаан дахь ТИКА-гийн үүрэг, оролцоо: Нийтийн дипломат ажиллагааны өнцгөөс авч үзэх нь” - др. проф. Экрэм Калан – Алааддин Кейкубат Их Сургуулийн захирал /Аланья хот/
“Монгол-Туркийн стратегийн түншлэлд хүрэх боломж: Батлан хамгаалах салбарын хамтын ажиллагааг бэхжүүлэх нь”, Ж.Мэндээ, БХИС-ийн Батлан хамгаалах эрдэм шинжилгээний хүрээлэнгийн дэд захирал
“Турк-Монголын харилцаан дахь олон улс, бүс нутгийн нөлөө” - др. проф. Рагип Каража, Истанбул хотын Аядин их сургууль

Цахим хэлэлцүүлгийг хааж, Монгол Улсаас БНТУ-д суугаа Онц бөгөөд бүрэн эрхт Элчин сайд, доктор Р.Болд хэлсэн үгэндээ “... судалгааны байгууллага хоорондын хамтын ажиллагааг цаашид улам өргөжин хөгжүүлэхэд чухал ач холбогдолтой хэлэлцүүлэг болсон”-ыг онцлон тэмдэглэж, судлаачдад амжилт хүссэн байна.

ШУА-ийн Олон улсын харилцааны хүрээлэн нь сүүлийн жилүүдэд БН Турк улсын эрдэм шинжилгээний холбогдох байгууллагуудтай идэвхтэй хамтран ажиллаж байгаа бөгөөд 2019 онд Монгол Улс, БН Турк улсын хооронд дипломат харилцаа тогтоосны 50 жилийн ойг тохиолдуулан олон улсын эрдэм шинжилгээний хурлыг Туркийн талтай хамтран амжилттай зохион байгуулсан билээ.