Боловсрол, шинжлэх ухааны сайд Л.Энх-Амгалан Олон улсын харилцааны хүрээлэнд ажиллав

• 

  Нийтлэсэн Б Нямдаваа
• 2021-04-02
• 456

    УИХ-ын гишүүн, Боловсрол, Шинжлэх ухааны сайд Л.Энх-Амгаланаар ахлуулсан тус яамны ШУГ-ын дарга, С.Мөнхбат, Инноваци, технологийн газрын дарга Д.Одгэрэл нарын албаны хүмүүс ШУА-ийн хүрээлэнгүүдийн II байранд байрлах хүрээлэнгүүдийн үйл ажиллагаатай танилцах хүрээнд 2021 оны 4 дүгээр сарын 1-ний өдөр Олон улсын харилцааны хүрээлэнд хүрэлцэн ирж, эрдэмтэд судлаачдын төлөөлөлтэй уулзаж, тэдний санал бодлыг сонсон ажил хэрэгч уулзалт хийв.
    Уулзалтын үеэр тус хүрээлэнгийн захирал Д.Золбоо хүрээлэнгийнхээ товч танилцуулга болон сүүлийн жилүүдэд хэрэгжүүлж буй судалгааны ажлын үр дүн, онцлох ажлууд, 2021-2025 онд хэрэгжүүлэх Захирлын үйл ажиллагааны хөтөлбөрийнхөө талаар танилцууллаа. Энэ үеэр эрдэмтэд хүрээлэнгийн өмнө тулгамдаж буй зорилтууд, түүний шийдвэрлэх талаар санал хүсэлтээ Сайдад танилцуулж ярилцсан байна.
    БШУ-ны сайдын зүгээс хэдийгээр төсөв бага, орон тоо цомхон боловч Монгол Улсын гадаад бодлого, орон судлал, олон улсын харилцааны чиглэлээр олон жил тогтвортой үйл ажиллагаа явуулж байгаа тус байгууллагын үйл ажиллагааг өндрөөр үнэлж, цаашид тус хүрээлэн дээр олон улс судлалын судалгааг хэрэгжүүлж ирсэн уламжлалыг дэмжин хөгжүүлэх, энэ чиглэлээр тодорхой төсвийг нэмэлтээр батлуулах талаар дэмжин ажиллахад бэлэн байгаагаа илэрхийлсэн байна.
    Албан уулзалтын дараа Сайд болон албаны хүмүүс тус хүрээлэнгийн номын сантай танилцаж, тус хүрээлэнгийн эрдэмтдийн бүтээлтэй танилцсан байна. Энэ үеэр хүрээлэнгийн эрдэмтдийн Японы боловсролын хөгжил, бага сургуульд ёс зүйн боловсролыг олгож буй талаарх ололт амжилтыг нэгтгэн гаргасан зөвлөмжийг бүх шатны боловсролын байгуулагад хүргэх, энэ чиглэлээр өмнө хийгдсэн цуврал судалгааг УИХ-ын даргад уламжлан танилцуулж, төсөл болгоход дэмжлэг үзүүлэхээр тогтсноос гадна БШУЯ-наас Аж үйлдвэрийн IV хувьсгал ба цахим шилжилт, Олон улсын шинжлэх ухааны тогтолцооны талаар захиалгат судалгааг тус хүрээлэнгийн эрдэмтдээр хийлгэхээр тогтож, төслөө боловсруулан танилцуулахыг үүрэг болгосон байна.

---

Бусад мэдээлэл